Joh 5 | EMI | STEP | Kasina nau angghe lao sio me Iesu ghe saela eJerusalem tale mene kateva uneira nivelu eitaua aJiu etoa.

John 5

Iesu ghe ghelei emasinala tangorengorena ateva

1 Kasina nau angghe lao sio me Iesu ghe saela eJerusalem tale mene kateva uneira nivelu eitaua aJiu etoa. 2 EJerusalem kateae atamana laghe aseasea va Atamani Sipsipi ia. Kalakala tale atamana ateae, ateo talia ngateae ghe asoaso ghalima varandaane, me ta samasamaaira aIbru etoa laghe aseasea va Betesda. 3 Oroi tau sessa ghe asoaso akalakala tale ia o ateo talia ngateae, katoa mata salusalu ila me katoa tapakase ila me katoa vilikiira matena. ^{▼▼5:3-4Kasina uru ngai nau laghe pitila, laghe ue teela va,laghe toitoi nau manu eteva ghe aisiisia.4Kasina nau kapuna ensolo ateva Vau ngepona ateva ghe siosio, ghe aisiisia manu eteva, me lo ateva ghe siosio akasina tale ateo talia ngateae, nau ghe aisiisia, arova saa ase isiki etana, ghe maamasina.} 5 Kateva taumattu ghe tangorengorela kotolungaulu ghaoaluae (38) ninamanama, ie tee ghe asoaso akalakala tale ateo talia ngateae. 6 Iesu ghe tarala ia o taumattu ngateva ghe asoaso, ghe kilala va angghe tangorengorela oroi ninamanama, me ghe uela etana va, “Ualoanna tani masina?”

7 Tangorengorena ateva ghe liula me ghe uela ta Iesu va, “Namu ngateva, karika teva tani saueghi, me elaa sau velueghi sio tale ateo talia ngateae nau eaisiisia. Vara atootoonga, me karika arooroo, ta mene katoa ppae taumattu la siosio akasina.”

8 Iesu ghe uela etana va, “Tingina saela, usau komom, me ukasu.” 9 Gharavaeaata ta taumattu ngateva ghe masinala, ghe saula komona, me ghe tiuaala tani kasu.

Isaa o voto ghe lutula tale nau manga ateva. 10 AJiu etoa laghe tarala ia o taumattu ngateva ghe masinala, me laghe uela etana va, “Ghaine nau manga ateva. Karika masina tani sau komom etana.”

11 Ghe liula me ghe uela va, “Lo ateva taumattu eghelei emasinaieghila, euela va asau komoghu me akasu.”

12 Me laghe kolomiela va, “See ia taumattu ngateva euela etam va usau komom me ukasu?”

13 Taumattu ngateva ghe masinala karika ghe kilala va see ghe elei emasinaiela, poli oroiannaaili taumattu, me Iesu angghe aisavisavilainiela elome tale taumattu ngatoa.

14 Emulina Iesu ghe ssola tale ale manga ateva, me ghe saopila taumattu ngateva. Me ghe uela etana va, “Tarala, angughe masinala. Isaa oio nau urau nim ghelei ssavoto va llo sesaaili emene lutu ta ngetam.” 15 Ghe lao sio me ghe laa ghauliaa sio ta aJiu etoa va Iesu ghe elei emasinaiela.

16 Liuna avalua o me aJiu etoa laghe tiuaala tani ghelei voto sesaaili ta Iesu, poli ghe eelei isaa o voto tale nau manga ateva. 17 Iesu ghe uela va, “Tamaghi euungu me karika ghe ruu, me aghi tee auungu.” 18 AJiu etoa laghe aloannaaili tani uvi emate Iesu, poli karika va ghe elei laelaeaa nonga nau manga ateva, me poli ghe ue tee va Tamane ta God, ghe eeleia va lalu ghe airoaa me God.

Natuna ateva God namuu ia, me ie tee erooroo tani ghelei niuungu

19 Iesu ghe uela etaira va, “Aghauliaa ngakoronna etaimim va Natuna ateva God karika erooroo tani ghelei voto ta nannaane. Egheelei nonga voto etaatara ta Tamane egheelei. Isaa akapa voto Tamane egheelei, Natuna tee ateva egheelei. 20 Tamana eailousia Natuna, liuna avalua o me isaa akapa voto egheelei, eaapasunga etana. Me ealoanna va am soghiaa, liuna avalua o me aue mene apasunga taula mene kasina paka voto. 21 Nongina Tamane etottotu taumattu matena, me etautau lao maulue etaira, Natuna tee etautau lao maulue ta taumattu tale aloaloanaane. 22 Tamane karika egheelei niaisakei ta teva taumattu. Ghe taula ta Natuna va ie nonga eghelei niaisakei tale isaa akapa taumattu. 23 Liuna avalua o me taumattu ngakapa atoa aue la tau sae ararina ateae Natuna ateva God, nongina la tautau sae ararina ateae Tamane. Lo ateva etam tautau sae ararina ateae Natuna, karika etautau sae ararina ateae Tamane, ia ghe sungiela.

24 “Aghauliaa ngakoronna etaimim va lo ateva enongo inangarighi, me eaikaaia ta lo ateva ghe sungieghila va asio, maamauluaane aue toka amasina nau ekapa atoa, me karika aue eaisakei, poli angghe kasu vulila nimate, me angghe tokala tale maulue. 25 Aghaauliaa ngakoronna etaimim va aue kateva nau, me nau eteva oia ange rekatala, lo atoa taumattu laghe matela, aue la nongo lingi ngalona ateva Natuna ateva God, me lo atoa taumattu la nongoa, aue la ghaa maulue. 26 Maulue ateva ta Tamane, me ghe tauela ta Natuna, me maulue ateva tee ta Natuna. 27 Tamane ghe avauvauela me ghe tau lao sio niuungu tani ghelei niaisakei tale taumattu, poli Natuna ia Taumattu ngateva.

28 “Am rau mene nnangaili inangari oio aghaulia, poli aue nau to emaemae lo atoa taumattu la asoaso tale liu, aue la nongo lingi ngalona ateva Natuna ateva Taumattu ngateva, 29 me aue la totu tale liu. Lo atoa laghe eelei masi voto, aue la totu me la ghaa maulue, me lo atoa laghe eelei sesa voto, aue la totu me la ghaisakei. 30 Karika arooroo tani ghelei voto tale aloaloanaaghi. Aghaaimuli tee inangarina lo ateva ghe sungieghila. Me ia eaaulia tau mae vaalua aghelei niaisakei. Niaisakei agheelei ghulughuluena, poli karika aghaimuli tee nannaaghi.”

Mene katoa laghe aulia ngaotu tee va Iesu saa taumattu ia

31 “Arova aghi nonga aghaaulia ngaotu uunguaaghi me eleiaaghi, taumattu ngatoa la rau mene aiesoa inangarighi aghaulia. 32 Mene kateva tee eaulia ngaotu uunguaaghi me eleiaaghi, me akilakila va voto eaulia koronna.

33 “Am ghe suula taumattu tani laa kolomi Jon, me Jon ghe auliaala voto koronna etaira. 34 Aghi karika atuutuli inangariira taumattu ngatoa, mausina me aghaulia inangari oia poli aghaloanna va am saanga. 35 Jon nongina lama ateae eramerame me emaamallanga, me am ghe masimasi tani gha isaa o mallanga, vara karika masau me ngam ghe maamangoo.

36 “Isaa o voto Jon ghe auliaala esuisui kkai mae etaghi, me karika erooroo tale voto isaa oia nau agheelei. Isaa akapa o niuungu, Tamaghi ghe tau mae sio va aghelei me aruu. Isaa o niuungu agheelei eaulia ngaotu ta taumattu ngatoa va Tamaghi ghe sungieghila tani sio oia. 37 Tamaghi, ia o ghe sungieghila tani sio, ie tee eaulia ngaotueghi. Am karika am ghe nongo poi lingi ngalona ateva, me karika am ghe tara taataraane, 38 me inangarina tee karika elome tale maamauluaaimim, poli karika am aiesoa tale taumattu ngateva ghe sungiela, me ghe sio mae oia. 39 Am anna va inangari tale Uru ngai Manga ateva aue tau aatu maulue, liuna avalua o me am paepae me am ritiritia. Me Uru ngai Manga ateva eaulieinaghi, 40 me karika am aloanna tani mae etaghi va am ghaa maulue.

41 “Karika aghanna va taumattu ngatoa la arueinaghi. 42 Akilakilaiem va aielousiaane ateva God karika ia etaimim. 43 Aghe sio mae ta ararina ateae Tamaghi, me karika am anna inangarighi, me arova teva ghele mae tale aloaloanaane, arovaeaata ta aue am ghele anna tani nongo inangarina. 44 Vaalua aue am aikaaia, poli am anna nonga va kapuimim atoa la arueinam, me karika am anna niarua God nonga erooroo tani tau aatu.

45 “Karika am mene nna va aghi aue akotimiem ta Tamaghi. Ia o Moses am anna va aue sausiem, ia aue kotimiem. 46 Arova am ghele aiesoa tale inangarina Moses, aue am ghele aiesoa tee tale inangarighi, poli inangari ghe pitila eaulieinaghi. 47 Arova karika am aiesoa tale inangari ghe pitila, vaalua aue am aiesoa inangarighi?”